تعرفوا انا دلوقتي حاسس بأية ؟؟
حاسس بأحساس غريب جدا وصلني تقريبا لليأس
حاسس أن الدايرة ضاقت عليه أوي من كتر قسوة الدنيا
وبجري أدورعلى اصحابي بتوع زمان مش لاقي ولا واحد منهم عنده استعداد يحتويني أو يسمعني أو يعرف مالي ولو لقيت حد يسمعني يرد عليه بكلمة واحدة "معلش" !!
حاسس أن اقرب الناس ليه معندهمش استعداد يسامحوني على اتفه الغلطات لكن انا المفروض أسامح كل الناس على اي حاجة مهما كانت كبيرة !!
ده يعني لو حد أعترف أنه غلط مع العلم ان كل الناس ملايكة مبيغلطوش وانا الشيطان الوحيد في الدنيا !!
حاسس أن الناس الناس حواليه عايزيني أسمعهم وأحل مشاكلهم وأقف جنبهم وأساعدهم وأبتسم لهم , ودايما لازم يكون عندي الحل السحري لكل المشاكل وكأني ملاك - لما يحتاجوني - مش بني ادم !!
عارفين احساس الوحدة ؟؟
حاسس اني اعرف مليون شخص وعندي اهل واخوات وناس كتير محسوبين عليه اصحاب
بس مع كل ده حاسس اني وحيد في الدنيا !!
حاسس أن الضغط زاد حواليه اكتر من اللزم لدرجة اني حاسس اني مشلول ومش قادر أتحرك !!
حاسس ان كل الناس الاغراب عني بيقدروني ويحترموني وكبير أوي في نظرهم !!
وفي نفس الوقت اهلي وأقرب الناس لية مش شايفيني اصلا لاني صغير جدا في نظرهم !!
حاسس أن كل كلامي يبقى بالنسبالهم غلط وكل افعالي غلط حتى سكوتي غلط و ثورتي غلط وخروجي غلط وشغلي غلط وحياتي كلها غلط في غلط !!
ويوم لما حد منهم يكتب فيه شعر يقول عني
فكل أفعالك أخطاء سبحان الله *** معصوم أنت من الصواب
عارفين انا حاسس بأيه ؟؟
حاسس ان مينفعش يكون كل الناس دي غلط وانا اللي صح !!
خلاص بقة عندي قناعة داخلية اني فعلا كدة , وحش جدا زي ما بيقولوا
بس في نفس الوقت انا كدة مش عارف اكون غير كدة !!
تعرفوا انا حاسس باية ؟؟
حاسس اني مليش مكان هنا
