امبارح وانا مروح بليل لمبة البنزين نورت وده معناه ان معايا 50 كيلو بالتمام والكمال المهم بصراحة كسلت خصوصا ان مكنش معايا فلوس كاش وقولت لسة هروح اسحب فلوس م الصراف وفيلم بقة اخر الليل!! وقولت الصبح وانا نازل اسحب فلوس وافول .. الصبح نزلت وانا نايم اكلينيكيا دورت ومشيت ونسيت ان ممعيش فلوس في جيبي ونسيت البنزين خالص وحتى عيني مالمحتش اللمبة المنورة قدامي ع الشاشة المصيبة اني خرجت رايح بلد جنب الرياض مسافة 80 كيلو تقريبا وبعد ما مشيت حوالي 40 كيلو بدأت العربية تصفر عشان البنزين المهم الحمد لله اخدت بالي وكان في بنزينة على بعد اقل من كيلو و اول مادخلت البنزينة افتكرت ان ممعيش فلوس كاش خالص بطلت العربية ووقفت اتلفت على صراف مفيش يادي المصيبة سألت عامل البنزينة لو بيقبلوا الكريدت كارد قالي مفيش وقفت اضرب اخماس في اسداس ومش عارف اعمل اية المهم محطة البنزين فيها سوبر ماركت كبير قولت ادخل اشوف لوينفع يسحب اي مبلغ من الكريدت ويديهولي كاش شاب يمني قولتلة اعتذر بأدب وقالي عندي تعليمات ان السحب للمشتريات بس يا اخي طيب هشتري اي حاجة بأي مبلغ واديني 10 ريال بس احط بنزين يوصلني البلد الجاية اسحب فلوس من اي صراف واوعدك ارجعلك فلوسك رفض رفض قاطع وانا بقيت في نص هدومي من الاحراج المهم وانا خارج لقيت 2 شباب مصريين داخلين السوبر ماركت وقفتهم ولسة بقولهم عربيتي خلصت بنزين وقبل ما اكمل كلامي لقيتهم بيقولولي ربنا يحنن وعلى الله وفاكريني بشحت :D قولتلهم استنوا يا جدعان انا مابشحتش استغربوا وقالولي امال عايز اية قولتلهم الموضوع وقولتلهم ان الشاب رفض يديني فلوس كاش ويسحبها من الكارد واني ممكن ادفعلهم تمن الحاجات اللي داخلين يشتروها بالكارد وهما يدوني الفلوس كاش وكنت متخيل وانا بقولهم انهم هيوافقوا عادي وان الموضوع بسيط وكدة اتفاجأت ان واحد فيهم بيقولي وافرض الكرديت ده مسروق؟ اتعجبت جدا وطلعت الكريدت اللي علية اسمي طبعا وطلعت اقامتي ورخصة القيادة ورخصة العربية اللي عليهم اسمي وصورتي بلغتين وقولتله اتفضل شوف اسمي عليها ومش مسروقة ولا حاجة اخدهم من ايدي بص فيهم كلهم كدة وقعدوا يبصوا لبعض ورجعهملي وقالي لا معلش انا اسف وانا مش قادر اصدق بصراحة وسابوني ودخلوا السوبر ماركت وانا واقف مش عارف اعمل اية ومش مصدق اللي بيحصل وحاسس اني في حلم سخيف ومش عايز يخلص .. مشيت وقفت جنب العربية ومخي مشلول عن التفكير تماماً لقيت عامل البنزينة "البنجالي" جاي بيقولي "جيب سيارة يا صديق انا ركب بنزين" قولتله مفيش فلوس كاش قالي "ما في مشكلة بعدين فلوس جيب انت شكل نفر كويس" ابتسمت وقولتلة طيب شكراً بس ممكن مرجعش النهاردة ممكن اجيب الفلوس بكرة قالي "الله كريم ما في مشكلة" قولتلة طيب حط 10 ريال بس بنزين 95 -وانا كل همي اني امشي 30 كيلو اوصل البلد اللي رايحها عشان الاقي ماكينة صراف واسحب فلوس- قالي "اوك جيب سيارة" المهم حركت العربية ووقف يمون وانا باصص وهو بيحط ولقيتة عدى ال10 ريال قولتله كفاية كدة كفاية مردش علية ولا كإنه سامعني وهو بيتمتم "الله كريم" وساب البنزين لغاية ما فول العربية 46 ريال وانا لساني معقود ومش فاهم حاجة وخلص وقفل التانك وقعد من غير ولا كلمة كل اللي قدرت اقوله شكرا ان شاءالله هجيبلك الفلوس وهو مابيقولش غير "الله كريم" معلومة على جنب كدة عمال محطات البنزين مرتباتهم بتتراوح مابين 400 الى 600 ريال مش اكتر يعني اغلب من الغلب المهم مشيت وانا قاعد افكر في موظف السوبر ماركت اللي رفض يديني كاش ويسحبه من الكارد والاتنين المصريين اللي فكروني بشحت في الاول ولما فهمتهم قالولي يمكن مسروقة ولما اتأكدوا ان اسمي عليها ومش مسروقة اعتذروا!! تخيلوا ده كله عشان 10 ريال مبلغ تافة مايشتريش علبة سجاير وعامل المحطة المسكين صعبت علية وفول العربية باكتر من 10% من مرتبه في شهر افتكرت ابويا وهو كان زمان بيقولي اصلها مابتهونش الا ع الفقير المهم رحت مشواري وسحبت فلوس من اول صراف قابلني واخدت عهد على نفسي اني وانا راجع لازم اثبت للعامل ده ان فعلا "الله كريم" وقد كان :)
22/04/2016
08/01/2016
الله يعلم أنا لا نحبّكم *** ولا نلومكم ان لم تحبّونا
الله يعلم أنا لا نحبّكم *** ولا نلومكم ان لم تحبّونا
02/01/2016
الاشتراك في:
الرسائل (Atom)